Vigo abonou as súas facturas en 8,8 días no último trimestre de 2021
O alcalde ofreceu este luns un dato que sitúa ao consistorio vigués á cabeza das urbes españolas, segundo afirmou. Caballero puxo en valor a importancia do pronto pago para as empresas e afirmou que, entre outubro e decembro do pasado ano, o Concello tramitou operacións por valor de case 52 millóns de euros.
En declaracións en rolda de prensa, o alcalde manifestou que “pagar pronto significa evitar a centos de empresas pedir pólizas de préstamos aos bancos, que custan diñeiro”, polo que un prazo medio de 8,8 días é “un resultado excepcional” que Caballero comparou cos “concellos e administracións públicas que tardan en pagar corenta, cincuenta e oitenta días”.
“Somos xente da economía, eu son o alcalde da economía, Vigo é a cidade da economía. Para nós a economía é o centro da cidade”, enxalzou Caballero, quen asegurou que “pagamos máis rápido que calquera empresa privada de toda Europa e somos os máis rápidos pagadores de toda España”.
O alcalde lanzou outra cifra para explicar a magnitude das transferencias ordenadas polo Concello de Vigo polos servizos e obras que contrata: máis de 9,7 millóns de euros abonados en 757 operacións de pago só nestes primeiros días do mes de xaneiro. “Estamos orgullosísimos de atender á economía de Vigo con esta prontitude e a esta velocidade”, concluíu Caballero.