Escoitar

O goberno de Vigo reparte entre a cidadanía outras 45.000 máscaras faciais

Cedidas polo Goberno de España, o Concello entrégaas principalmente entre colectivos vulnerables e/ou en risco de exclusión, que reciben 30.000. Outras 10.000 se distribuirán nos mercados municipais e as 5.000 restantes, a asociacións de maiores. Desde primavera, Vigo facilitou en total case que 300.000 máscaras, segundo subliñou este xoves o alcalde.

xoves, 17 dec 2020
En abril, unha voluntaria entregando máscaras no entorno do mercado do Calvario
En abril, unha voluntaria entregando máscaras no entorno do mercado do Calvario

Abel Caballero informou este xoves do reparto doutras 45.000 máscaras faciais que remite o Goberno de España. Na distribución, o Concello decidiu primar aos colectivos vulnerables e/ou en risco de exclusión, que recibirán dous terzos do total. As 30.000 unidades chegarán a eles a través de máis de corenta entidades sociais, asociacións, ONG, comedores sociais, CEDRO e do albergue municipal de Marqués de Valterra, ademais de directamente aos usuarios dos servizos sociais do Concello que acudan ás Unidades de Traballo Social.

O terzo restante chegará ás mans dos vigueses e viguesas nos mercados municipais e nas asociacións de maiores, que recibirán 5.000. Explicou Caballero que voluntarios do Concello distribuirán 10.000 unidades nas contornas dos mercados municipais, este sábado desde as 9 horas nos do Calvario, Teis, Bouzas e Cabral, e o próximo mércores, desde a mesma hora, de novo no Calvario, Travesas, Progreso e o Berbés. Cada sobre contén cinco máscaras faciais.

O alcalde indicou que, con esta nova remesa de 45.000 protectores, o Concello de Vigo xa fixo entrega desde primavera de preto de 300.000 máscaras entre os vigueses e viguesas, das que 100.000 foron adquiridas directamente pola administración que preside Caballero e as outras 200.000, procedentes do Goberno de España.

Descargar todas as imaxes