O sorteo do premio "Inter rail 2009", convocado por Xuventude, celebrarase mañá ás 12 horas no Punto Xove
O Punto Xove da Concellería de Xuventude, ubicado na rúa López de Neira, acollerá mañá 19 de xuño, ás 12 horas, o sorteo do "Inter rail 2009". Nesta cuarta edición do premio sortearase un dobre inter rail na modalidade Global Pass, de xeito que dúas persoas poderán viaxar en tren gratuitamente durante 10 días, por máis de 30 países dentro dun periodo de 22 días.<br />
Neste sorteo convocado pola Concellería de Xuventude de Vigo en colaboración con Renfe, puideron participar todos os mozos e mozas con idades comprendidas entre os 18 e 35 anos empadroados en Vigo, que depositaron o seu cupón en calquera das dependencias da Concellería de Xuventude, a Casa Xuventude, o espazo Súbete ao Castro e o Punto Xove.