Constituiuse o novo Consello da Xerencia de Urbanismo que aprazou, para o luns 21 de xullo, a toma de decisións sobre a execución de sentencias do Tribunal Superior de Xustiza de Galicia do Pepri Finca do Conde. O alcalde reunirase previamente coas partes implicadas para tomar o acordo antes da súa prescrición.
A concelleira de Festas e Animación sociocultural, Margarida Martíns, presentou a novena edición do Festival folclórico internacional que se celebrará do 18 ao 24 de xullo coa participación de Xilingol (Mongolia), Yacamba (Venezuela) e Baza (Andalucía).
A concelleira de Deportes, María Xosé Porteiro, presentou a XI Bandeira de traíñas Concello de Vigo que se celebrará o domingo 20 de xullo nas proximidades do Real Club Náutico. Repartiranse 12.710 euros en premios.
A Concellería de Cultura colabora na organización da Bienal Eixo Atlántico-V Premio de pintura que se inaugura o venres 18 de xullo ás 20:00 na Casa das Artes.
De novo un grupo galego, The Pinga, vai participar no IV Verán de teatro que organiza a concellería de Festas e Animación Sociocultural, coa presentación da súa última montaxe, a obra "Urbe".