Abre o prazo de presentación de propostas para os concertos ao aire libre no Pazo de Castrelos
O Concello publicará mañá, venres 10 de abril, as bases da convocatoria para seleccionar as actuacións do ciclo de concertos ao aire libre nos xardíns do Pazo de Castrelos deste verán.
A histórica contorna do Pazo Museo Quiñones de León será escenario este verán de actuacións musicais durante todos os domingos do mes de xullo, a partir das 12,30 horas.
Os xestores e grupos musicais poden presentar as súas propostas de concertos e espectáculos para conformar a programación a través do rexistro electrónico do Concello. O prazo de presentación de ofertas prolongarase durante 15 días, tras a publicación do anuncio no perfil do contratante do Concello, aloxado na Plataforma de Contratos do Estado.
Coa renovación dos concertos este verán o Concello ofrece unha programación de interese para a cidadanía nun espazo patrimonial extraordinario.