O goberno local executará unha transformación integral do Mercado de Teis
O Concello acometerá unha reforma integral do Mercado de Teis, anunciou esta mañá Abel Caballero. Cun orzamento de 1,8 millóns e un prazo de execución de sete meses, o goberno local aprobará mañá o proxecto básico e de execución.
A Xunta de Goberno Local aprobará mañá venres o proxecto básico e de execución da reforma do Mercado de Teis o que permitirá realizar unha “transformación total” das instalacións. Cun orzamento de 1.866.960 euros e un prazo estimado de execución de 7 meses, a actuación prevé a renovación do pavimento principal existente, da recollida de augas e do saneamento; reparacións e pintados; substitución da iluminación común por equipos de eficiencia enerxética; habilitación de espazos para oficinas de dirección do mercado; demolición e nova construción de escaleiras; construción e reubicación da cafetería e o espazo polivalente e de usos múltiples; instalación de dous elevadores con capacidade para oito persoas; substitución de ventás; renovación da entrada e renovación e construción de novos aseos.
Respecto aos traballos exteriores, o alcalde detallou que está prevista a reparación de paredes, fiestras e portas; abrir novos ocos nas paredes para crear accesos desde o exterior á cafetería e o novo local destinado á floraría; a demolición dunha escaleira e a creación dunha rampla de acceso; renovación e impermeabilización das terrazas e, finalmente, unha instalación fotovoltaica na cuberta.