O Goberno local dedicou 600.000 euros á mellora da pista deportiva do Centro Cultural e Recreativo de Becerreira
O alcalde inaugurou este xoves as obras de mellora realizadas polo Concello na pista deportiva no Centro Cultural e Recreativo de Cabral-Becerreira, por un importe de 600.000 euros, á vez que descubriu a placa en homenaxe ao finado deportista de fútbol sala Miguel Gil García. “É o día do deporte, da afectividade e do recordo”, afirmou o rexedor ao expresar o seu apoio á nai e avoa do novo desaparecido en 2019.
Abel Caballero percorreu hoxe o pavillón deportivo de Becerreira onde o Concello realizou obras de mellora e que aumentan a seguridade en todo o perímetro das instalacións. O Concello puxo en funcionamento o conxunto da actuación na pista deportiva do centro Cultural de Becerreira en Cabral, cun investimento de 600.000 euros que significou transformar unha pista ao descuberto nun auténtico pavillón deportivo".
Durante a visita, o rexedor colocou unha placa en homenaxe a Miguel Gil García, un usuario moi novo e querido polos veciños falecido en 2019. A nai e a avoa do deportista, así como os compañeiros cos que compartía a súa afección polo fútbol sala, participaron no acto de recordo celebrado este xoves.
