O Concello aprobou o proxecto de compensación do Barrio do Cura, que podería iniciar as obras este ano
O seguinte paso será ratificar o proxecto de urbanización e solicitar os informes preceptivos ás administracións, para someter ambos a exposición pública, segundo explicou este xoves Abel Caballero, de cara á luz verde definitiva. “O Barrio do Cura continúa a súa marcha e agardamos completalo o antes posible”, valorou o alcalde.
A última reunión do Consello da Xerencia municipal de Urbanismo deu luz verde de forma provisional ao proxecto de compensación do Barrio do Cura. “En breve”, engadiu Caballero, “aprobaremos o proxecto de urbanización” e, para a ratificación definitiva, tamén terán que recibirse os preceptivos informes das administracións implicadas. Ambos documentos sairán ademais a exposición pública.
Cando os dous proxectos estean aprobados de forma definitiva, o Concello estará en disposición de conceder as licencias. A previsión, avanzou o alcalde, é que as obras poidan comezar este mesmo ano.
“Será unha obra importantísima”, manifestou Caballero, con parcelas para equipamentos e para o propio Concello, que recibirá á correspondente para o 10% de edificabilidade que lle corresponde. O alcalde tamén puxo en valor que a cidade vai dispor dun millar de metros cadrados aproximadamente para a nova escola infantil municipal, zonas verdes e espazos de titularidade municipal.