Escoitar

O Marco estrea Fundación

martes, 22 out 2002
imx1897.jpg
Alonso, Pérez Varela, Castrillo, Abeledo, Príncipe e Gayoso
O alcalde de Vigo, Lois Castrillo, asinou a escritura da Fundación Marco que estará dedicada á realización de actividades culturais de investigación, formación, conservación e exhibición da arte e cultura contemporáneas. ”O Marco será un centro de difusión artística da cidade máis creativa e cosmopolita de Galicia”, afirmou o alcalde.



A escritura da Fundación Marco está asinada, ademais do alcalde, polo conselleiro de Cultura, Xesús Pérez Varela: o presidente da Deputación de Pontevedra, José Abeledo: e o director xeral de Caixanova, Julio Fernández Gayoso.

”Coa constitución do padroado da Fundación Marco péchase un soño de oito anos no que se construiu un centro de arte contemporánea onde antes había un cárcere, dentro dun proxecto de creación de cidade con espacios para pasear e asistir a eventos de interese cultural”, sinalou Castrillo. O rexedor agradeceu a declaración do edificio por parte da Consellería de Cultura como Ben de Interese Cultural que serviu para a súa preservación e os apoios entusiastas e económicos da Deputación de Pontevedra e Caixanova.

O concelleiro de Cultura, Carlos Príncipe, destacou que o Marco nos introduce no mapa cultural de Europa e conta coa máis moderna, democrática e participativa fórmula de xestión. Príncipe entregoulles aos presentes un agasallo conmemorativo do tricentenario da Batalla de Rande.
Descargar todas as imaxes