Vigo consolídase como capital do basket 3x3 cun amplo calendario de actividades ao longo do ano
O rexedor puxo en valor a colaboración activa do Club Baloncesto Seis do Nadal, encargado da organización das actividades, así como o apoio da Federación Galega de Baloncesto. “Xa celebramos con grande éxito o Torneo Cidade de Vigo de Nadal, que funcionou perfectamente, e seguimos avanzando cun calendario que inclúe un torneo en Semana Santa, na primeira semana de abril; un campus específico de baloncesto 3x3, con data aínda por definir; o Campionato de Galicia sub-17, que se organizará en maio e no verán, o emblemático 3x3 de O Marisquiño”, detallou.
Vigo reforza a súa aposta polo baloncesto 3x3 cun ambicioso programa de eventos deportivos e formativos que converterán á cidade nun referente desta modalidade en Galicia. Así o destacou o alcalde, Abel Caballero, quen subliñou que “Vigo ten a súa propia cancha de desenvolvemento e participación do baloncesto 3x3, e desde o Concello queremos que cada vez sexa unha cidade máis basket, apostando con forza por esta disciplina”.
Caballero destacou tamén os valores do deporte: “O baloncesto é un deporte magnífico, extraordinario, brillante, capaz de transmitir valores fundamentais. En Vigo queremos entrar neste ámbito coa maior forza posible”.
Pola súa banda, Sergio González, director deportivo do CB Seis do Nadal, sinalou que “é un orgullo, da man do Concello, sacar adiante un conxunto de actividades dirixidas á divulgación e á formación no baloncesto 3x3, unha modalidade que medra co paso dos anos e que está claramente en auxe”. “O campus de 3x3 será a súa primeira edición e unha idea pioneira en Galicia. Agardamos que sexa un éxito para formar xogadores e xogadoras, pero tamén adestradores e árbitros nesta disciplina”, manifestou na rolda de prensa.
O presidente da Federación Galega de Baloncesto destacou igualmente a “gran colaboración do Concello de Vigo” e agradeceu contar cun club “cun equipo humano tan sólido como o Seis do Nadal”. Segundo explicou, “é fundamental formar técnicos específicos de 3x3, xa que estamos máis afeitos ao 5x5, e tamén imos aproveitar os torneos para instruír aos nosos árbitros nesta modalidade”.