Caballero destaca que o Goberno cumpre con Vigo ao contratar o estudo ambiental do AVE directo a Madrid por Cerdedo
O alcalde destacou que a publicación, este venres, no Boletín Oficial do Estado do anuncio de formalización do contrato para a redacción do estudo informativo complementario para lograr a avaliación de impacto ambiental do tramo do AVE Vigo-Madrid por Cerdedo constata o compromiso do Goberno coa cidade. O rexedor lembrou que os prazos se fixaron na reunión desenvolvida o 19 de febreiro con responsables do Ministerio de Transportes.
O rexedor destacou hoxe o inicio da redacción do estudo complementario para lograr a avaliación de impacto ambiental da conexión ferroviaria do AVE directo de Vigo a Madrid por Cerdedo. “O Goberno está a cumprir”, afirmou Caballero ao recalcar que a publicación hoxe no BOE da formalización do contrato para a redacción do impacto ambiental e o estudo informativo complementario previo é outra mostra de que o executivo central “asumiu o compromiso do AVE de Vigo a Madrid directo por Cerdedo, que é o gran obxectivo que eu expoño para esta cidade, e por tanto, está a cumprir os prazos e imos ter a conexión”.
O alcalde explicou que os novos estudos iniciados son complementarios aos xa existentes sobre as vertentes hidroxeolóxicas e xeotécnicas do tramo. O novo estudo, adaptado á nova normativa ambiental europea, realizarase en 18 meses, co obxectivo de que no primeiro trimestre de 2027 saia a exposición pública e a partir de aí, redacción definitiva, impacto ambiental e as obras.
O alcalde lembrou que ao expoñer ao Goberno presidido por José Luis Rodríguez Zapatero a súa proposta de conexión directa do AVE a Madrid, “xa tiñamos a declaración de impacto, porque se aprobou con Elena Espinosa como ministra de Medio Ambiente, e Rajoy, o PP e Feijóo paralizárono e deixaron caducar o estudo de impacto ambiental", de xeito que agora é preciso recuperar este tempo de atraso.