O goberno de Vigo reclama á Deputación a sinatura do convenio 2024-2027
O alcalde lamentou que Vigo “siga esperando a firma” do convenio anual por importe de 5 millóns de euros que viñan acordando ámbalas institucións nos últimos oito anos.
“Seguimos esperando a sinatura do convenio anual por importe de 5 millóns de euros” sinalou o rexedor olívico, engadindo que o goberno municipal enviou toda a documentación precisa para o acordo no mes de marzo, polo que pasaron “oito meses e seguimos sen que a Deputación asine o convenio”.
A ausencia do acordo para este ano 2024 supoñería que a Deputación deixe de participar no financiamento de obras de interese para a cidade como a humanización das rúas da contorna de Balaídos, a iluminación do monte da Guía, a cuberta do Pavillón Coia, a nova piscina de Teis, a cuberta da bancada e os vestiarios do campo de Bouzas, a mellora do pavillón do Carballal en Cabral, a instalación do skate park cuberto de Navia ou a cubrición de patios como o do colexio Josefa Alonso, o do Celso Emilio Ferreiro ou o do Lope de Vega así como a humanización de Serafín Avendaño ou as beirarrúas de Clara Campoamor, segundo censurou o alcalde.
Abel Caballero reclama ao ente provincial a sinatura do convenio lamentando que a Deputación de Pontevedra non “amose interese en colaborar cando Vigo achega practicamente a terceira parte dos seus ingresos. Non quero crer que pretendan quitarnos un ano da subvención”.