O Concello inviste 1,5 millóns de euros na mellora do parque Nelson Mandela de Navia
A Xunta de Goberno Local aprobou este xoves a contratación da primeira fase das obras de mellora integral, novo arborado e mobiliario no parque de Navia que será “para todo Vigo”.
Tal e como recolle a memoria do proxecto, a actuación contempla a mellora das conexións entre os espazos interiores do parque coa rúa Teixugueiras, a implantación de xardinería e arborado, a reordenación do parque por zonas: auditorio ao aire libre, xogos de Teqball, zona canina, labirinto vexetal, zonas de relax e lectura, zonas de esculturas; a renovación da rede de rega e a instalación de novo mobiliario urbano.
O alcalde informou do trámite en rolda de prensa e avanzou que o obxectivo é “recuperar o parque con criterios de integración na contorna urbana” desde un punto de vista paisaxístico e modificando a súa configuración para mellorar o aproveitamento dos espazos. Cun investimento de 1,5 millóns de euros, o renovado parque de Navia será “para todo Vigo” e sumarase á oferta de espazo natural e de esparexemento do parque de Castrelos.
Cuberta do Pavillón de Coia
A Xunta de Goberno deu luz verde este xoves á contratación das obras de conservación e mellora da cuberta do Pavillón de Coia por un importe de 163.027 euros. A obra inclúe a substitución dos canlóns e o lucernario así como a instalación dunha nova estrutura para a ancoraxe do lucernario. A actuación será executada ao tempo que se mantén a actividade na instalación.
Piscina das Travesas
Ademais, na sesión da Xunta de Goberno quedou aprobada a contratación das obras de execución da substitución de instalacións no centro deportivo da piscina de As Travesas cun orzamento de 687.000 euros. O obxectivo é mellorar as instalacións térmicas e eléctricas da piscina con novos equipos de deshumectación do aire dos espazos con recuperación de calor, novas caldeiras e bomba de calor e medidas de eficiencia enerxética. A maquinaria existente, en mal estado de conservación debido ao paso do tempo, será substituída nun prazo estimado de obras de 2 meses.
Amais, o goberno municipal está redactando o proxecto de reforma da piscina de Teis que sufriu un “dano inmenso” tras o incendio.