Escoitar

Primeira reunión en Vigo da Comisión Executiva do Eixo Atlántico

A Comisión Executiva do Eixo Atléntico reuniuse este mércores en Vigo para tratar diversos temas relacionados co funcionamento do ente transfronteirizo e o desenvolvemento dos seus obxectivos, entre os que a comunicación ferroviaria de alta velocidade entre Galicia e o Norte de Portugal ocupa un lugar "estratéxico", segundo sinalou o seu presidente e alcalde de Vila-Nova de Gaia, Luis Filipe Menezes.

mércores, 24 out 2007
1193236117eixobugallo241007.jpg
Os alcaldes de Vigo (Abel Caballero), Vila-Nova de Gaia (Luis Filipe Menezes) e Santiago (Xosé Sánchez Bugallo)
Menezes afirmou que a reunión deste mércores en Vigo, a primeira da Comisión Executiva que ten lugar na nosa cidade, "traza un novo ciclo de funcionamento" do Eixo Atlántico, marcado por cambios como os que haberá que realizar nos estatutos do ente para adaptalos á lexislación que España e Portugal veñen desenvolvento como froito da colaboración entre Galicia e a rexión portuguesa veciña.

Ademais, nesta nova etapa o Eixo Atlántico contará con catro novos membros, tal e como acordou este mércores a Comisión Executiva. Son as localidades portuguesas de Lamego e Penafiel e as galegas de Santa Uxía de Ribeira e Sarria. Deste xeito, o Eixo Atlántico pasa a estar formado por 32 cidades e vilas.

En canto aos obxectivos do ente transfronteirizo, a Comisión Executiva abordou propostas de intervención técnica e política en diversos ámbitos para a integración de Galicia e o Norte de Portugal e a mellora da calidade de vida dos seus habitantes.

Destas propostas, Luis Filipe Menezes salientou as relativas á mobilidade e aos transportes da eurorrexión, que teñen, dixo, un valor "estratéxico" para o desenvolvemento deste proxecto europeo.

O presidente do Eixo Atlántico destacou, en especial, a conexión ferroviaria de alta velocidade entre o Norte de Portugal e Galicia, en relación á cal indicou que "temos que ser moi pragmáticos". Menezes asegurou que a prolongación da liña Lisboa-Porto ata Vigo e Galicia "continúa como compromiso firme do lado portugués".

Neste sentido, Menezes referiuse á carta enviada pola secretaria de Estado dos Transportes de Portugal, Ana Paula Vitorino, ao secretario xeral do Eixo Atlántico, na que "reafirma os compromisos asumidos" por Portugal e considera "prioritaria para o Estado Portugués" a ligazón ferroviaria Vigo-Porto, prevéndose que sexa operativa en 2013, cunha velocidade de 250 km/hora e carácter mixto, isto é, para pasaxeiros e mercadorías.

Vicepresidencia do Eixo Atlántico

Por outra parte, a Comisión Executiva acordou nomear o alcalde de Vigo, Abel Caballero, vicepresidente do Eixo Atlántico. Luis Filipe Menezes celebrou esta decisión salientando a "visibilidade, competencia e experiencia política" do alcalde vigués.

En relación á alta velocidade, Caballero lembrou que por parte española a práctica totalidade do tramo entre A Coruña e Vigo está en obras ou en trámite de licitación, e indicou que o tramo entre Vigo e Tui que completaría a conexión coa liña portuguesa podería estar rematado en 2012 ou 2013.
1193236117eixobugallo241007.jpg
1193236144eixoreunion241007.jpg
1193236177eixosentados241007.jpg
Descargar todas as imaxes