Caballero valora a “canteira de músicos fóra de serie” de Vigosónico
O alcalde visitou este mércores as instalacións de Vigosónico e asistiu ás interpretacións protagonizadas polo alumnado que durante dúas semanas participa na segunda edición do Laboratorio de Creación Musical para a Mocidade.
O rexedor destacou a calidade do curso de Vigosónico no que 45 mozas e mozos, con idades de entre 12 e 22 anos, reciben formación sobre todo o proceso de creación musical, desde a composición á difusión, por profesionais vinculados a distintas disciplinas da industria musical e por artistas. “O curso é fantástico. Está moi ben deseñado. Neste eido, é o mellor que se está facendo en toda España”, afirmou.
Caballero destacou a calidade da formación, impartida por 17 profesores, que recibe a mocidade neste laboratorio sobre composición, arranxos e interpretacións, así como sobre márketing e fotografía, entre outros.