O Consello Municipal da Muller concede o "Premio Ernestina Otero" á avogada Ana María García Costas
A avogada Ana María García Costas recollerá o vindeiro venres 20 de marzo o “XIV Premio de Igualdade Ernestina Otero”, acordado por unanimidade polo Consello Municipal da Muller, en recoñecemento ao seu traballo como asesora xurídica no ámbito da violencia de xénero na ONG “Faraxa. Pola abolición da prostitución” e na asociación “Alecrín” de defensa dos dereitos das mulleres.
A programación municipal con motivo do 8 de marzo, que este ano ten por lema "Día internacional da Muller. Democracia son dereitos", acolle a décimo cuarta edición da entrega do “Premio de Igualdade Ernestina Otero” que este ano premia as achegas da avogada viguesa Ana María García Costas na defensa dos dereitos das mulleres, especialmente das vítimas da violencia de xénero e das vítimas de trata e explotación sexual.
A gala de entrega terá lugar o venres 20 de marzo, partir das 20.00 horas, no Centro Social Afundación.
Programa
O xoves 5 de marzo arrinca o programa de actos do 8M coa actuación no Auditorio Municipal de “Gala e Ovidio” a partir das sete da tarde. O domingo 8 de marzo terá lugar a manifestación que sairá ás 12 do mediodía desde a Praza de España.
Ao longo do mes de marzo desenvolveranse 14 xornadas en torno ao feminismo cun total de 18 actos que inclúen concertos, espectáculos de danza, proxeccións, recitais, monicreques, teatro e conferencias e formación.
