Avanzan “a moi bo ritmo” as obras de construción da nova bancada de Gol
Abel Caballero explicou que a finais desta semana procederase á demolición da vella escaleira de caracol. Co remate destas obras só sería necesario reformar a Tribuna para alcanzar os 43.500 espectadores esixidos por FIFA, para ser sede do Mundial 2030.
“Tres bancadas do estadio municipal de Balaídos quedarán feitas e preparadas para o Mundial 2030”, indicou Caballero, referíndose ´as renovadas bancadas de Río, Marcador Centenario e Gol. Deste xeito só se tería que reformar a Tribuna para alcanzar os 43.500 espectadores esixidos por FIFA. A nova bancada do estadio municipal de Balaídos, conta cun investimento de 26 millóns de euros e estará terminada a principios de 2027.
Iniciadas as obras de Gol, o pasado mes de xaneiro, nestes intres xa “finalizaron as demolicións interiores” e avanza a “demolición da unión entre Río e Gol”, explicou o rexedor vigués. Tamén recordou Caballero que, como no caso da construción da bancada de Marcador Centenario, o Concello de Vigo entregará como recordo un anaco do formigón de Gol, nunha plataforma de metacrilato, a todas as persoas que o soliciten.
