A estrela estadounidense Jason Derulo estará en Vigo o 8 de agosto
Abel Caballero confirmou esta mañá o "gran concerto en Castrelos” para o Vigo en Festas 2025 deste verán.
”O cantante, compositor, bailarín e actor Jason Derulo actuará en Castrelos o venres 8 de agosto”, desvelou o alcalde esta mañá. Orixinario de Florida e con descendencia haitiana, converteuse nun artista de talla mundial, realizando actuacións ao redor de todo o mundo.
Chegará a Vigo coa súa xira “Be the first to hear about”, na que tocará os seus grandes 'hits' como ''Whatcha Say”, “Swalla” ou “Wiggle”, con máis de mil millóns de visualizacións en Youtube. Caballero sinalou que “o seu tema “Colors” foi escollido como un dos himnos do Mundial de Fútbol de 2018”.
Entre as súas últimas creacións destaca o tema "Mamacita", que conta coa colaboración do cantante de reguetón e trap latino, Farruko. O rexedor explicou que “actualmente conta con 27 millóns de oíntes mensuais en Spotify” e máis de 66 millóns de seguidores en Tik Tok.
Trátase da oitava confirmación da programación de verán en Castrelos:
- Ana Belén – 12 de xullo
- Gente de Zona – 17 de xullo
- Trueno – 18 de xullo
- Rozalén – 24 de xullo
- Vanesa Martín – 31 de xullo
- Ópera La Traviata – 1 de agosto
- Jason Derulo – 8 de agosto
- India Martínez – 16 de agosto