Vigo en Festas incorpora unha novidade para este verán, a ópera Rigoletto de Verdi
O alcalde anunciou que a ópera encherá o auditorio de Castrelos o venres 9 de agosto, cun aforo de 2.500 cadeiras na platea.
Abel Caballero anunciou esta mañá “unha gran novidade” para os concertos de Castrelos do vindeiro verán, xa que terá lugar a interpretación de Rigoletto, a ópera mestra de Giuseppe Verdi. A realización “da ópera ao aire libre”, será o venres 9 de agosto.
Rigoletto é unha ópera en tres actos con música de Giuseppe Verdi, baseado na obra teatral El rey se divierte, de Victor Hugo. Trátase dun drama de paixón, engano e vinganza, no que o seu protagonista é Rigoletto, o bufón da corte do ducado de Mantua.
Foi estreada en 1851 no teatro La Fenice de Venecia. Destaca a peza «A donna è mobile», interpretada durante anos “polos mellores tenores da historia”, como Luciano Pavarotti. Forma xunto con El Trovador e La Traviata (ambas de 1853), a triloxía popular operística que compuxo Verdi a mediados da súa carreira.
O alcalde explicou que “para a súa interpretación en Castrelos non realizarán descanso, contará cunha duración de 2 horas”, xa que habitualmente na súa interpretación realizan unha parada intermedia de 25 minutos. Chegará a nosa cidade cun elenco de artistas internacionais, que deleitarán ao público cunha versión clásica da obra mestra de Verdi, pero cunha dirección escénica moderna e dinámica.
Coa chegada de Rigoletto, xa van nove confirmacións para este verán en Castrelos:
- Dani Fernández (13 de xullo)
- Coral Casablanca (20 de xullo)
- Luis Fonsi (23 de xullo)
- Sen Senra (25 de xullo)
- Luz Casal (2 de agosto)
- UB40 (7 de agosto)
- Ópera Rigoletto (9 de agosto)
- Víctor Manuel (14 de agosto)
- Melendi (17 de agosto)
