Abel Caballero chama á unidade en contra da violencia contra a muller
Abel Caballero chamou este xoves a seguir contestando á violencia machista e a defender o dereito á igualdade das mulleres, especialmente ante os partidos que “queren retrotraernos” ao pasado, cun “proceso de unidade” social e cultural permanente liderado polas mulleres. Así se expresou ante o delegado do Goberno en Galicia, Pedro Blanco, e ante as persoas que participaron no acto organizado no Museo de Arte Contemporánea de Vigo con motivo, o próximo 25 de novembro, do “Día Internacional da Eliminación da Violencia contra a Muller”.
O alcalde, acompañado polas concelleiras, Carmela Silva, Elena Espinosa, Yolanda Aguiar, Ana Mejías e Ana Laura Iglesias, e o edil Gorka Gómez, participou no acto organizado pola Delegación do Goberno centrado na intervención perfo-poética “Traga”, conducido pola poetisa Yolanda Castaño.
Despois de asistir á declamación poética de Yolanda Castaño, Blanca Trigo, Chus Pato, Silvia Penas e Lorena Souto, e á performance da actriz Ana Xesto, o rexedor remarcou a transcendencia do acto reivindicativo, transformado en “denuncia activa”. Insistiu en que “hai que acompañar ás persoas que reclaman a revolución do 50 por cento da poboación, das mulleres, dos dereitos de igualdade e da loita contra a violencia machista”.
Abel Caballero alertou sobre a situación pola que está “a emerxer a máis profunda antirevolución contra os dereitos das mulleres, e ten nome de partido político”. A primeira tenente de Alcaldía, Carmela Silva, lembrou ás máis de 50 vítimas da violencia machista en 2023 e a importancia das expresións de miles de mulleres denunciando a desigualdade.
