O servizo de teleasistencia atendeu a 731 persoas no mes de outubro
O alcalde avanzou esta mañá que o servizo municipal de teleasistencia asistiu o mes pasado a 731 usuarios, maioritariamente mulleres, con idades comprendidas entre os 80 e os 94 anos. O Concello aprobou recentemente un incremento do contrato para poder atender a cen persoas máis.
O alcalde fixo balance esta mañá do servizo de teleasistencia que no mes de outubro atendeu a 731 persoas. Esta prestación asiste maioritariamente a mulleres de idades comprendidas entre os 80 e os 94 anos que viven soas a pesar de ter familia, porque seguen valéndose por si mesmas.
Segundo detallou, a teleasistencia municipal ten establecidos diversos protocolos de axenda para estar pendentes de situacións como ingresos ou traslados hospitalarios, recordatorios de tratamentos, seguimentos tras emerxencias, suspensións temporais, seguimentos especiais e incluso celebracións de aniversarios.
Este ano, o Concello ampliou o contrato deste servizo para poder atender a cen usuarios máis cun aumento orzamentario de 4.000 euros o que eleva o custo total a 288.158 euros. Ademais, comparou o rexedor, a prestación municipal é gratuíta e non hai lista de agarda, mentres que a da Xunta é de pago e ten lista de agarda.