Escoitar

O programa de voluntariado medioambiental do Concello suma 180 participantes

Os labores de cooperación céntranse estes días na erradicación dunha especie de planta invasora na zona húmida da Bouza. O alcalde destaca a importante participación nas hortas urbanas “cunha mobilización de case 500 persoas”.

mércores, 20 abr 2022
Persoas voluntarias participan na retirada de plantas invasoras na zona húmida da Bouza
Persoas voluntarias participan na retirada de plantas invasoras na zona húmida da Bouza

Na rolda de prensa deste mércores Abel Caballero informou dos traballos que están realizando estes días os voluntarios do programa municipal de voluntariado ambiental Camiño a Camiño na zona húmida da Bouza. Hai 11 persoas que participan na retirada da Tradescantia fluminensis, unha especie exótica invasora que ten unha grande capacidade colonizadora e que, no caso deste espazo, está tapizando importantes superficies, desprazando á flora autóctona.

A acción do voluntariado consiste en atallar a súa expansión e, durante as próximas semanas, facer actuacións co fin de reducir a súa zona de actuación e erradicala. Previamente, as persoas voluntarias recibiron formación por parte dun técnico da área de Medio Ambiente na que se lles explicou o impacto que ten esta planta no ecosistema e cal é a técnica de retirado

O alcalde expuxo que, nesta nova edición de 2022, o programa de voluntariado ambiental do Concello conta coa participación de 180 persoas: cen realizan labores comunitarias en hortas (arranxando camiños, arrombando os espazos para que poidan traballar despois os usuarios) e, amais destes voluntarios, as hortas contan con 300 persoas usuarias plantando e colectando, o que supón “unha mobilización de case 500 persoas nas hortas urbanas”.

Amais, o Concello conta con outros 80 voluntarios participan nos diferentes programas activos: conservación e mantemento de sendeiros locais, retirada de especies invasoras no Monte da Guía e en distintos areais vigueses, acompañamento de cans da protectora e a protección da bolboreta arlequín.

Ademais, este ano o goberno municipal incorpora como novidade o voluntariado en Vigozoo, “no que estamos facendo unha transformación radical. Non queremos un zoolóxico con animais salvaxes en catividade, é unha crueldade absoluta”, apuntou o rexedor, que engadiu que se está transforman o zoo nunha aula medioambiental urbana no que 15 persoas voluntarias colaboran con labores de conservación e enriquecemento ambiental para a reconversión do espazo.

 

Descargar todas as imaxes