Escoitar

Abel Caballero reclamará ás comunidades autónomas o 15% dos fondos europeos para os concellos

O presidente da FEMP avanzou este venres algúns dos temas que abordará esta fin de semana no marco da XXVI Conferencia de Presidentes que se celebra na Illa da Palma coa presenza do presidente do Goberno e de tódolos presidentes autonómicos.

venres, 11 mar 2022

O alcalde participa este domingo no encontro no está previsto que as comunidades autónomas e o Goberno de España falen sobre a guerra de Ucraína e a acollida de refuxiados e desprazados pola invasión de Rusia. “Falarei da forma na que o estamos enfocando e da disposición dos concellos para a acollida das persoas refuxiadas”, avanzou.

Caballero expoñerá o “tratamento tan importante” que se lle está dando aos concellos nos fondos Next Generation EU “superando as previsións máis optimistas; vamos a cifras extraordinariamente importantes”. Amais apuntou que reclamará ás comunidades autónomas que “saquen convocatorias dos recursos recibidos do Goberno de España” a través dos fondos europeos para que os municipios poidan participar deles e que “atendan a petición municipal de destinar o 15% dos fondos recibidos para combater a pandemia”.

Por último, o rexedor olívico expuxo o seu apoio á posición do goberno de España de reformar a tarificación eléctrica: “Europa ten que cambiar a forma de fixar os prezos da electricidade, non pode ser que as subas do gas, signifiquen suba de prezo da electricidade e os que xeran electricidade con recursos eólicos ou hidráulicos teñen beneficios infinitamente multimillonarios”. Censurou que sexan a cidadanía e as industrias as que paguen a electricidade máis cara e que diso se beneficien “algunhas industrias eléctricas. Iso non é posible. Hai que repartir excedentes baixando o prezo”.

 


No marco da XXVI Conferencia de Presidentes, mañá sábado celébrase o Acto de Homenaxe á Exemplaridade do Pobo da Palma, presidido polas súas Maxestades os Reis e no que se fará entrega dos recoñecementos e a lectura da declaración institucional adoptada polo Consello de Ministros.

 

Descargar todas as imaxes