Caballero destaca o papel relevante dos concellos na restitución aos propietarios dos bens inmatriculados da Igrexa

“Estamos a iniciar o camiño da restitución dos bens inmatriculados, un camiño que debe continuar con máis bens e propietarios” pero que “representa un paso moi significativo”, asegurou esta mañá Abel Caballero, no transcurso do acto no que o Ministro da Presidencia, Relacións coas Cortes e Memoria Democrática lle fixo entrega dun documento e un pen- drive coa información correspondente aos bens inmatriculados pola Igrexa católica para a localización e posterior restitución desde os concellos aos seus lexítimos propietarios.

No acto, celebrado na sede da FEMP, ambos manifestaron a plena disposición a colaborar para levar adiante este proceso no que as entidades locais xogan un papel relevante, nun mecanismo que prevé que, tras recibir a información remitida desde a FEMP, os alcaldes e alcaldesas poidan iniciar o proceso de localización dos propietarios.

Para o presidente da FEMP, esta liña de colaboración establecida co Executivo vén amosas o “músculo político, a capacidade e a presenza vertebradora territorial dos concellos”. O Ministro Bolaños, pola súa banda, subliñou na súa intervención que “imos colaborar, a cooperar para acompañar sobre todo aos concellos máis pequenos que teñen menos medios, que teñen menos capacidade para asesoralos”, de xeito que os bens poidan ser recuperados “para o dominio e para o patrimonio público, e tamén, cando corresponda, para o patrimonio e a titularidade dunha persoa física”. Así mesmo, manifestou que “este é un primeiro acordo” e que o traballo continuará para “seguir estudando distintos bens para, cando cumpra, regularizalos e devolvelos aos seus lexítimos titulares”.