O alcalde denuncia unha Atención Primaria “inoperativa” e pide máis puntos de vacinación
“Quero reiterar a miña protesta total pola forma na que a Xunta está a tratar a Atención Primaria da cidade; está practicamente inoperativa”, asegurou este xoves Abel Caballero, quen insistiu ademais en reclamar a vacinación contra o Covid en máis municipios, como fan en Murcia ou nos concellos portugueses da beira do Miño.
O alcalde elevou a voz este xoves contra as decisións sanitarias da Xunta de Galicia en Vigo, en particular no relativo á Atención Primaria e ao sistema de vacinación contra o coronavirus: “Xa está ben de maltratar á xente de Vigo”, afirmou.
No primeiro caso, Caballero manifestou que a Atención Primaria está “practicamente inoperativa” porque a administración autonómica “non é quen de dotar de persoal ás necesidades da Primaria, os profesionais están exhaustos e temos unha enorme crise na Atención Primaria desta cidade”.
En segundo lugar, o alcalde reiterou a súa queixa polo modelo de vacinación que aplica o goberno presidido por Núñez Feijóo, no que Vigo exerce como única sede para unha área sanitaria de 570.000 persoas. Coa decisión, “a Xunta lles obriga a vir aquí, todo iso produce unha enorme saturación, nos illan o aeroporto, e produce unhas colas indebidas para os cidadáns”.
Así, o primeiro edil contrapuxo este sistema con outras formas de proceder, como en Murcia por exemplo, e amosou unha imaxe da vacinación nun polideportivo de Fuente Álamo, municipio de 16.000 habitantes. Ademais, trasladou Caballero que tamén inxectan en cinco urbes lusas da beira do Miño: Melgaço, Monçao, Valença, Vilanova de Cerveira e Caminha.
“Non é certo que non se poida vacinar nun sitio pequeno”, engadiu Caballero, quen demandou descentralizar o modelo para evitar os desprazamentos e colas, e tamén habilitar “cinco ou seis” espazos en Vigo cidade, á vista do que se fai en Oporto, onde teñen “varios puntos de vacinación”.