O Concello organiza por primeira vez un curso gratuíto para formar ata 25 socorristas
O alcalde informou este venres da iniciativa, que busca capacitar como socorristas a titulados en Actividade Física e do Deporte. A preinscrición se formaliza no 010 durante a próxima semana e o alumnado compaxinará as clases teóricas con prácticas nas praias de Vigo.
O Concello de Vigo oferta 25 prazas no seu “Curso de adaptación da actividade física e deportiva ao socorrismo en espazos acuáticos naturais”, unha nova iniciativa formativa e de emprego coa que busca capacitar a titulados na rama deportiva como socorristas cun ensino mixto: teórico e práctico.
O alcalde informou este venres do curso e explicou que o alumnado terá a posibilidade de inscribirse no Rexistro Profesional de Socorristas de Galicia e exercer nas dez praias de Vigo con bandeira azul, incorporándose ao servizo municipal de salvamento que funcionará desde o 15 de xuño ata o 15 de setembro con 47 profesionais.
As persoas interesadas deben ser tituladas na licenciatura ou no grao en Ciencias da Actividade Física e o Deporte, ou no Ciclo de Técnico Superior en Animación de Actividades Físicas e Deportivas. O Concello dará prioridade aos empadroados en Vigo e aceptará aos candidatos doutros municipios en tanto queden prazas libres.
O Concello abre este luns o proceso de preinscrición. Desde o día 10 ata o 14 de maio, ambos incluídos, os interesados poden anotarse no teléfono 010, desde as 8 ata as 20 horas. Posteriormente, a formalización será a través do correo electrónico que lles facilitarán telefonicamente, onde terán que dirixir a solicitude, o certificado de empadroamento, unha declaración responsable polo Covid e a copia da súa titulación requirida en actividade física e deportiva.
Abel Caballero avanzou que esta formación gratuíta permitirá "proporcionar socorristas en tempo e forma en todas as praias da cidade" que dispoñen deste servizo. O alcalde recordou que Vigo conta este ano con dez praias distinguidas coa Bandeira Azul (Rodas, Fortiñón, Canido, O Vao, Fontaíña, Samil, Argazada, Tombo do Gato, Carril e A Punta) e o dispositivo municipal estará conformado por 47 persoas, ás que se sumarán os axentes da sección Costa e Praia da Policía Local de Vigo. O Concello adica anualmente ao servizo de socorrismo e salvamento 566.000 euros.