O goberno local planta 60 árbores na Avenida de Castelao
O alcalde destaca a “alta calidade arbórea” das especies que comezaron a plantarse este martes e que conformarán “bosques temáticos” ao longo da pradería da Avenida “no corazón da cidade”.
Trala visita á zona na que o goberno municipal está iniciando os traballos de plantío, Caballero avanzou que “seguiremos reforzando o bosque da Avenida de Castelao agora con 60 árbores”, que están “no centro; no corazón da cidade”.
O rexedor explicou que se crearán cinco tipos de bosques temáticos ao longo da avenida, cada un con árbores diferenciadas: bosque de especies de ultramar, bosque ripario, bosque de montaña, bosque atlántico e bosque mediterráneo.
O Concello foi retirando de forma progresiva os chopos existentes “que eran unha peste” e durante os próximos días quedarán plantadas 60 árbores de “alta calidade” e especies “preparadas”, ao tempo que se manterán algunhas árbores consolidadas na pradería como os Liquidambar styraciflua, Betula alba ou Ginkgo biloba.
