“O Concello aposta porque no 2030 estea acabado o corredor de AVE de Vigo a Lisboa”
Abel Caballero valorou este xoves a reunión celebrada o día previo co ministro de Infraestruturas portugués, Pedro Nuno de Oliveira Santos, “moi importante e moi eficaz” na que o alcalde trasladou o apoio ao tren rápido entre Lisboa, Porto e Vigo, que deixaría á cidade olívica no “centro” do eixo atlántico.
Tratouse “dunha reunión moi cordial, na miña opinión moi importante e moi eficaz”, expresou este xoves Abel Caballero, quen ofreceu o seu apoio á liña de Alta Velocidade entre Lisboa e Vigo. O alcalde amosoulle ao ministro “a nosa satisfacción polo proxecto portugués e a nosa vocación de levar adiante a saída sur ferroviaria de Vigo en Alta Velocidade e levala ata a fronteira” co país veciño.
Os orzamentos xerais do Estado para 2021 recollen a elaboración dun estudo funcional de alternativas para a saída sur de Vigo. Caballero recordou que o tren entra por túnel ata Urzáiz e deberá continuar soterrado e saír á superficie unha vez pasado o casco urbano do Porriño e, desde aí, enlazar co territorio portugués.
“Neste momento”, indicou o rexedor vigués, “o Goberno de España tamén considera a saída sur e o AVE ata Portugal como unha prioridade e estamos en condicións de apoialo”, polo que manifestou que “o Concello aposta porque no ano 2030 estea acabado todo o corredor de Alta Velocidade desde Vigo ata Lisboa”.
Completar o eixo atlántico ferroviario uniría a capital lusa con A Coruña por Alta Velocidade, situando a Vigo no “centro” desde corredor. O alcalde puxo en valor a posición viguesa como estación de paso ata Madrid dos viaxeiros procedentes do norte de Portugal, como xa acontece actualmente no tránsito de vehículos.