O goberno local destina 1 millón de euros ao ascensor que conectará Travesía de Vigo e Aragón

bel Caballero explicou este luns en rolda de prensa que a construción do ascensor nesta zona é unha cuestión de "necesidade de que alí opere o Vigo Vertical" para salvar un desnivel de cinco pisos de altura, "máis alto que calquera outro dos ascensores que funcionan nestes momentos e que xa fixemos na cidade".

O goberno municipal prevé un investimento de arredor de 1 millón de euros financiado con cargo aos remanentes, polo que se incluíu xa na súa tramitación e situarase na rúa que conecta a Travesía de Vigo, á altura do número 160, coa rúa Aragón 203, xunto á igrexa de Santo Cura de Ars.

O alcalde cualificou a conexión como de "grande interese" para toda esta zona da cidade, onde residen máis de 20.000 persoas que nestes momentos deben subir escaleiras dunha altura de aproximadamente cinco pisos, o que fai "practicamente imposible" para moitas persoas acceder á rúa de Aragón desde Travesía.

O rexedor explicou que o ascensor é unha das novas obras que acometerá o Concello con cargo aos 33 millóns de euros de remanentes e avanzou que a esta contía cómpre sumarlle os 2.885.000 euros da modificación orzamentaria que mañá martes aprobará a Xerencia de Urbanismo para invenstir nun novo paseo na parte alta do río Lagares, que terá unha extensión de entre 3 e 4 quilómetros, e para realizar expropiacións na Panificadora.

Así, apuntou Caballero, "iniciamos o proceso de recuperación da Panificadora para os espazos públicos de Vigo", unha parte será a cargo do Concello e outra de Zona Franca. O alcalde incidiu na importancia desta acción de urbanismo que permite sumar case 3 millóns de euros máis aos remanentes que quedarán trala modificación nos 36 millóns de euros "para o cambio na cidade".