Vigo, á cabeza do crecemento aeroportuario en España no 2016
AENA publicou onte luns as estatísticas aeroportuarias correspondentes ao mes de febreiro, que confirman ao aeródromo vigués como o de maior crecemento de España en pasaxeiros durante o que levamos de ano. No mes de febreiro, a terminal viguesa "bateu récords" por segundo mes consecutivo, tal e como resaltou o rexedor en declaracións aos medios.
Abel Caballero felicitouse este martes polo crecemento rexistrado polo aeroporto de Vigo no mes de febreiro, un dato que, sumado ao de xaneiro, converte á terminal olívica no aeródromo que máis crece de España no ano 2016. En declaracións aos medios, Caballero reiterou a súa vocación de "tratar de permanecer nesta senda de recuperación facendo do aeroporto de Vigo un lugar central para toda Galicia porque -engadiu- o interese da Comunidade é que a terminal viguesa sexa capaz de atender todo o Sur de Galicia e todo o norte de Portugal, como así está sucedendo".