A maxia continúa o domingo no Auditorio Municipal co espectáculo "Da'Kara", do mago Dani García
A Concellería de Cultura e Animación Sociocultural organiza unha nova actuación dirixida ao público infantil e familiar o vindeiro domingo, 12 de xuño, ás 18 horas, no Auditorio Municipal. Trátase do espectáculo de maxia "Da'kara", que levará a escena o mago Dani García, do programa "Con t minúsculo". O prezo das entradas é de 3 euros para os nenos e nenas ata 12 anos e 5 euros para os maiores e pódense adquirir na web www.laboleteria.es ou na taquilla unha hora antes do comezo da actuación
Daniel García achégalle ao público de Vigo un espectáculo de maxia no que presenta a existencia dun lugar secreto neste mundo, que case ninguén coñece, chamado Da´kara. É un espazo onde a ledicia e a cooperación camiñan da man da inocencia. Para dar vida a esta realidade irreal, tres actores xogan coa ilusión e a fantasía de grandes e pequenos. A obra, dirixida pola actriz Flor Maceiras, destaca ademais polo coidado tratamento do público e das situacións.