O Concello transformará o Muíño do Vento nun novo espazo cultural e público
A Xunta de Goberno Local aprobou a licitación das obras de reforma do Muíño do Vento, no barrio de Ribadavia, cun orzamento de 504.802 euros e un prazo de execución de oito meses. O Concello realizará a actuación para recuperar o inmoble e a súa contorna como un novo espazo público para a cidadanía.
“Queremos recuperar esta zona como un espazo público de calidade, conectado co parque de Capuchinos e abrindo o barrio á cidade”, explicou Abel Caballero. A actuación desenvolverase nunha parcela municipal rectangular de 259 metros cadrados, na que se atopa unha edificación tradicional construída en 1950 e actualmente en situación de abandono. O inmoble conta con planta baixa, primeira planta e torreón, ademais dun peche perimetral con máis de medio século de antigüidade.
O proxecto transformará a planta baixa nun espazo destinado a pequenos concertos, recitais e actividades culturais, que tamén poderán contemplarse desde os niveis superiores do edificio. Ademais, rehabilitarase a fachada principal e parte dos laterais norte e sur, incorporarase vexetación na medianeira e crearase un novo xardín na parcela. “Isto vai transformar o barrio de Ribadavia nunha zona magnífica. Queremos recuperar espazos da cidade para toda a cidade”, sinalou o alcalde.
A rehabilitación do Muíño do Vento dá continuidade ao proceso de revitalización desenvolvido polo Concello no barrio, con actuacións de humanización e iniciativas como «Arte nas fiestras», un proxecto artístico colaborativo coa veciñanza para recuperar fachadas e xanelas de inmobles abandonados a través da pintura. A iniciativa naceu precisamente co obxectivo de converter Ribadavia nun “museo ao aire libre”. Caballero destacou que as 32 fiestras intervidas mediante este programa, xunto coa rehabilitación e posta en uso do Muíño do Vento, forman parte dunha estratexia municipal para recuperar a actividade, a imaxe urbana e os espazos de encontro do barrio.
