Caballero pide a Turespaña as mesmas axudas para voos internacionais que recibe Santiago
O alcalde remitiu unha carta á secretaria de Estado de Turismo para solicitar apoio ás futuras conexións do aeroporto de Vigo con Londres e París e pediu unha reunión para abordar a colaboración. Abel Caballero lamenta que Vigo non conte xa con estas rutas internacionais “porque a Xunta aínda non respondeu á petición de financiar a terzos novos destinos”.
Caballero reclama que as futuras rutas internacionais do aeroporto de Vigo reciban de Turespaña o mesmo apoio á promoción que se concede á conexión entre Santiago e Newark. O rexedor solicita ademais unha reunión coa secretaria de Estado de Turismo, Rosario Sánchez, para analizar “cando e de que forma” podería materializarse esta colaboración e facelo “o antes posible”.
O alcalde explicou que tivo coñecemento de que Turespaña financiará accións publicitarias para o voo entre Santiago e Newark e precisou que se trata de promoción dunha ruta xa existente, non do financiamento da súa implantación. “Cando teñamos as rutas internacionais a Londres e París, quero que Turespaña lle dea a Vigo a mesma axuda que lle dá ao voo de Santiago a Nova York”, afirmou.
Segundo manifestou, actualmente hai varias compañías interesadas en establecer novas rutas desde Vigo. Neste ámbito, volveu reclamar á Xunta de Galicia que asuma un terzo do custo da contratación das conexións con Londres e París, unha petición á que, segundo indicou, aínda non respondeu.
O rexedor aproveitou tamén para facer balance de pasaxeiros do primeiro semestre do ano, con máis de 544.000 pasaxeiros, fronte aos 522.339 do mesmo período de 2025. Caballero sinalou que a única ruta suprimida respecto ao pasado ano foi Londres, circunstancia que atribuíu ao incumprimento do contrato por parte de Ryanair, e defendeu que os datos demostran que o aeroporto continúa mantendo actividade e demanda.