A Feira do Libro de Vigo, na Praza Compostela do 1 ao 7 de xullo
Abel Caballero puxo en valor este martes a renovada colaboración do Concello de Vigo coa Federación Galega de Libreiros para a próxima edición da “Feira do Libro” que se celebrará do 1 ao 7 de xullo na Alameda da Praza Compostela. O rexedor destacou a interacción entre os escritores e os lectores que propicia a cita cultural anual.
O alcalde, Abel Caballero, o concelleiro de Cultura, Gorka Gómez, e a secretaria da Federación Galega de Libreiros, Celia Fernández, subliñaron a importancia do convenio polo que o Concello de Vigo achega 15.000 euros para a nova edición da “Feira do Libro de Vigo”.
O rexedor destacou a actividade e as interaccións que xera a cita cultural que se desenvolve na Alameda, á vez que lembrou que o Concello conta cunha caseta da biblioteca Neira Vilas e outra do Centro de Documentación e Recursos Feministas. Amais, trasladou á organización da feira o apoio do Concello así como o recoñecemento e agradecemento polo “traballo excepcional” que realizan para levar adiante cada edición.
A secretaria da Federación Galega de Libreiros apuntou o aumento de participantes na nova edición, coa presenza de 4 novos expositores que elevan a 21 o número de casetas que expoñerán as súas propostas literarias do 1 ao 7 de xullo. Destacou a achega da ilustradora María Lapido como autora do cartel co lema “Onde florecen os libros”.