A Femp asina a Declaración de Valladolid: o compromiso das cidades coa economía circular

A Declaración de Valladolid recolle o compromiso das cidades pola economía circular e supón para Abel Caballero “a solemnización do noso compromiso” coa defensa do medio ambiente e a sostibilidade. O acto puxo de relevo o papel dos gobernos locais no desenvolvemento do novo modelo porque “desde o local trazamos as vías e buscamos os camiños”.

O alcalde de Vigo destacou que unha Declaración coma esta recolle o traballo de moitos alcaldes e alcaldesas, sendo froito da cooperación municipal co Goberno de España. E referiuse de forma especial ao traballo realizado en Valladolid, onde “son pioneiros”. Neste sentido, Óscar Puente subliñou que “esta cidade atesoura unha traxectoria consolidada na súa aposta pola economía circular” na medida que foi “unha das primeiras cidades en promovela”. Na súa intervención sinalou, ademais, que “a economía circular é un paradigma que debe impregnar todas as políticas municipais”, e así o están aplicando na cidade castelán leonesa. Puente agradeceu á FEMP o impulso dado á Declaración de Valladolid.

O Secretario de Estado de Medio Ambiente, Hugo Morán, reiterou no acto que “para conseguir un modelo de complicidade social que sexa un modelo de éxito, é preciso contar co municipalismo” e destacou a importancia dun “pacto de país para conseguir que ese modelo de complicidade sexa un éxito nun curto prazo de tempo”.

Declaración de Valladolid

A “Declaración de Valladolid, o Compromiso das Cidades pola Economía Circular” actualiza os contidos, propostas e compromisos da “Declaración de Sevilla” que se asinou en marzo de 2017 en resposta ao chamamento ás “cidades europeas en favor dunha Economía Circular” realizado en París en setembro de 2015.

“Unha economía circular -di a Declaración de Sevilla-, que transforme os nosos residuos en recursos ofrecendo unha solución á crise ambiental que sufriremos co modelo económico de desenvolvemento liña”. Segue sendo o eixo central na Declaración de Valladolid que axusta aqueles principios e compromisos ao momento actual de crise sanitaria e económica por mor da pandemia e ao recentemente validado pola UE Plan de Recuperación, Transformación e Resiliencia cos 140.000 millóns de euros que comporta.

Na Declaración de Valladolid sinálase que “a situación de crise provocada polo coronavirus puxo de manifesto as deficiencias das nosas cidades, á vez que provocou importantes cambios no uso dos espazos públicos, do transporte, dos lugares de lecer, das relacións entre o medio urbano e rural”. Iso, di o texto, “obriga ao redeseño e rexeneración das nosas cidades e pobos”, apostando por un traballo coordinado das Administracións Públicas, en colaboración co sector privado e coa cidadanía. “Non podemos desaproveitar a oportunidade que nos brinda o Plan de Recuperación, Transformación e Resiliencia”, empraza a Declaración, que define e compromete o modelo de reconstrución de cidades e pobos: “acorde cos principios do Pacto Verde Europeo: economía circular, enerxía limpa, eficiencia enerxética, mobilidade sostible, incremento da biodiversidade, eliminación da contaminación e loita contra o cambio climático”.

As cidades que se adhiran á Declaración de Valladolid, coa que “a FEMP reafirma o compromiso local coa economía circular”, adquiren 16 compromisos: “Impulsar e apoiar tanto o chamamento que realizou a cidade de París por unha economía circular como a Declaración de Sevilla, asinada o 15 de marzo de 2017” é o primeiro; o compromiso central é “converter á economía circular nunha fonte de impulso das novas tecnoloxías que contribúa ao cambio do modelo económico e á redución de impactos ambientais”. Todo desde o recoñecemento ao “importante papel que teñen os gobernos locais nas accións de fomento e desenvolvemento dun novo modelo baseado nos principios da Economía Circular por ser a administración máis próxima, e a que por tanto pode previr os principais conflitos ambientais”.