O Concello concede a primeira licenza para un ascensor exterior nun edificio de vivendas
Ao amparo da nova ordenanza municipal recentemente aprobada, o goberno de Vigo autorizou obras para instalar un elevador no lateral dun inmoble da Avenida do Aeroporto. Abel Caballero recordou que o obxectivo é garantir a accesibilidade en edificios xa construídos e sen posibilidade de instalalo no interior.
Abel Caballero informou este luns da primeira licenza de obras concedida ao amparo da normativa de accesibilidade aprobada polo Concello a finais de 2020, que permite construír ascensores no exterior de inmobles existentes. Trátase, segundo indicou, dunha comunidade de propietarios dun edificio de catro alturas na Avenida do Aeroporto.
“Ata esta ordenanza non se podería construír, agora si”, explicou o alcalde sobre a autorización concedida. A ordenanza foi concibida singularmente para zonas de vivendas antigas da cidade, para que persoas de avanzada idade ou mobilidade residentes en pisos altos “non teñan que permanecer cativos durante semanas sen poder saír”. O proxecto presentado estima o prazo de obras en catro meses e propón erixir o elevador nun lateral da construción, ocupando terreos propios.
A norma en vigor procura solucionar un problema para persoas maiores e/ou dependentes, que quedan incomunicadas na casa ao non dispor de medios mecánicos no seu edificio, cuestión que afecta fundamentalmente a construcións dos anos sesenta, por exemplo no barrio de Coia. A ordenanza regula a instalación de elevadores no interior, amplía as opcións para acometelo e especifica as condicións para facelo no caso dun edificio declarado Ben de Interese Cultural. No caso de que non sexa posible, o Concello posibilita os ascensores en fachadas, establece as condicións para facelo, o procedemento para obter a licenza e as condicións mínimas nas que ten que quedar a vía pública afectada.