Clases maxistrais de Fred Frith e Nils Wogram
O Festival de Jazz de Vigo "Imaxina Sons" programa cada ano clases maxistrais que, por un lado, contribúen á experiencia formativa de músicos e afeccionados e, por outro, supoñen un excepcional achegamento entre artistas de sólida traxectoria con aquelas persoas que desexan afondar nos segredos do jazz e da improvisación. Na quinta edición do Festival de Jazz de Vigo Imaxina Sons as clases maxistrais serán impartidas por Fred Frith, o martes 30 de xuño, e polo trombonista Nils Wogram, o sábado 4 de xullo. A inscrición nestas sesións, que se desenvolverán no Conservatorio Superior de Música de Vigo de 11h a 13.30h, é gratuíta e podes facela premendo aquí http://www.imaxinasons.com/gl/inscricion
Un dos encargados de impartir a master class da quinta edición do Festival de Jazz de Vigo Imaxina Sons é o mestre da improvisación e guitarrista británico Fred Frith. Un luxo para todos aqueles músicos e afeccionados que queiran ter un tête-à-tête cun dos nomes senlleiros da música de vangarda. Tivemos a oportunidade de achegarnos á personalidade musical de Fred Frith en constante procura de novas sonoridades a través do documental Step Across the Border ( Nicolas Humbert, Werner Penzel, 1990), -proxectado na pasada edición do festival- que en 2000 foi escollido polos críticos da revista Cahiers du Cinema como un dos cen mellores filmes da historia. O documental retrata a este músico inclasificable, que deixou Europa a finais dos anos setenta despois dunha década como parte de Henry Cow, grupo vangardista onde ademais da guitarra tocaba o violín, o baixo, o piano e o xilófono. Tras chegar a Nova York, Frith intégrase na escena local do downtown con outros inclasificables como John Zorn ou Tom Cora. A discografía de Frith é inabarcable, xa que aparece nos créditos de máis de catrocentos discos sexa como solista, en banda ou en colaboración. Nesta edición de Imaxina Sons Fred Frith, ademais de impartir a master class, dirixe a Orquestra de Música Espontánea de Galicia e únese á Lucia Recio nunha experiencia artística chea de xogo e de indagación, de poesía e de ruído.
Pola súa parte, o músico alemán Nils Wogram, nacido en 1972, é unha das xóvenes e reputadas figuras do jazz europeo e nesta edición de 2009 de Imaxina Sons –participou na primeira co seu grupo Root 70- integra a formación de Lucas Niggli cun concerto o sábado 4 de xullo no Teatro Salesianos. En diferentes formacións, Nils Wogram participou nos máis importantes festivais europeos e con Root 70 xirou por todo o mundo. A súa actividade discográfica nos últimos tempos tamén é intensa: en 2008 gravaba con Root 70 o cuarto disco desta formación, titulado On 52nd 1/4 street, un directo con arume a Nova Orleans, e recentemente, neste mesmo ano, editaba coa banda Lush o disco Pretty Good News (Unit Records). Nils Wogram consegue que o trombón soe dun xeito non contemplado até agora no mundo do jazz, ese é o seu selo e o que provoca que crítica e público sigan de perto a súa traxectoria desde hai máis de dez anos. Da súa técnica brillante e versatilidade, así como dun certo gusto vintage que se pode apreciar nas súas gravacións, serán testemuñas directas aquelas persoas que participen da clase maxistral do trombonista.
Descargar todas as imaxes
Pola súa parte, o músico alemán Nils Wogram, nacido en 1972, é unha das xóvenes e reputadas figuras do jazz europeo e nesta edición de 2009 de Imaxina Sons –participou na primeira co seu grupo Root 70- integra a formación de Lucas Niggli cun concerto o sábado 4 de xullo no Teatro Salesianos. En diferentes formacións, Nils Wogram participou nos máis importantes festivais europeos e con Root 70 xirou por todo o mundo. A súa actividade discográfica nos últimos tempos tamén é intensa: en 2008 gravaba con Root 70 o cuarto disco desta formación, titulado On 52nd 1/4 street, un directo con arume a Nova Orleans, e recentemente, neste mesmo ano, editaba coa banda Lush o disco Pretty Good News (Unit Records). Nils Wogram consegue que o trombón soe dun xeito non contemplado até agora no mundo do jazz, ese é o seu selo e o que provoca que crítica e público sigan de perto a súa traxectoria desde hai máis de dez anos. Da súa técnica brillante e versatilidade, así como dun certo gusto vintage que se pode apreciar nas súas gravacións, serán testemuñas directas aquelas persoas que participen da clase maxistral do trombonista.