O Goberno local impulsa a recreación virtual do casco histórico de Bouzas
O alcalde informou de que o obxectivo é deseñar, desenvolver e implementar unha experiencia inmersiva que permita a reconstrución virtual do barrio histórico de Bouzas, poñendo en valor o seu patrimonio arquitectónico, cultural, social e mariñeiro mediante o uso das tecnoloxías máis avanzadas.
Segundo explicou Abel Caballero, o proxecto inclúe a dixitalización tridimensional do núcleo histórico de Bouzas, incorporando os seus principais elementos culturais e arquitectónicos. Ademais, crearase unha plataforma interactiva e accesible, tanto en formato web como aplicación móbil, que contará con modelos 3D, recursos audiovisuais, información histórica e locucións en galego, castelán e inglés. A iniciativa contempla tamén a incorporación da ruta patrimonial e dos seus 16 puntos de interese
“Queremos que toda España e todo o mundo poida estar no corazón de Bouzas”, expresou o rexedor.
Grazas a este proxecto, as persoas usuarias poderán percorrer virtualmente os principais puntos de interese de Bouzas mediante un mapa patrimonial tridimensional navegable, acceder a contidos contextualizados e activar audioguías en distintos idiomas, reforzando así a difusión e o coñecemento dun dos barrios con maior identidade histórica da cidade.
