Escoitar

O Concello prevé iniciar a finais de ano a musealización da Fortaleza do Castro

A Xunta de Goberno Local dará luz verde este xoves á licitación da obra de “Musealización das galerías e posta en valor da fortaleza do Castro” que ten un importe de 1.400.000 euros.

mércores, 24 ago 2022
O alcalde e Carmela Silva na presentación do proxecto das galerías en febreiro de 2022
O alcalde e Carmela Silva na presentación do proxecto das galerías en febreiro de 2022

Abel Caballero puxo en valor a obra polo que significará para a cidade e recalcou o financiamento da mesma por parte do Goberno de España, a través de fondos estatais.

O alcalde explicou que a musealización da muralla do Castro permitirá abrir os túneles e poñer en valor “este grande ámbito da cidade”: as galerías da fortaleza, o túnel escavado na roca e recuperar o vello polvorín, que se refará “porque está en condicións moi deterioradas”. Así, a cidadanía poderá visitar estes espazos da fortaleza e gozar da musealización dos acontecementos históricos en defensa da cidade dos séculos XVII, XVIII E XIX. “É a continuación de todo o que estamos facendo na muralla do Castro”, apuntou.

A previsión municipal é que o proxecto poida estar adxudicado no mes de novembro e, dende ese momento, iniciar a execución da obra.

Convenio Monte da Mina

Amais, a Xunta de Goberno aprobará o convenio de colaboración coa Asociación Veciñal Cultural e Deportiva “Monte da Mina” de Castrelos para axudar a financiar os gastos de mantemento da entidade e para a coordinación da xestión dun viveiro de asociacións nas súas instalacións, que ocupan dez locais do inmoble. O convenio ten un importe de 17.000 euros.

Descargar todas as imaxes