O Ministro de Xustiza, Mariano Fernández Bermejo, mantivo este luns no Areal un encontro de traballo co alcalde, Abel Caballero, no que asegurou que Vigo contará cun Xulgado do Mercantil. Bermejo afirmou que unha cidade "enormemente vital e industrial" non pode quedar sen esta dotación. Alcalde e ministro acudiron posteriormente á toma de posesión do fiscal xefe da área de Vigo.
Catrocentas firmas estarán representadas na novena edición de FranquiAtlántico, o Salón das Franquicias e dos Negocios, que se celebrará no IFEVI do 7 ao 9 de marzo. FranquAtlántico está consolidado xa como un dos referentes máis importantes do sector franquiciador no contexto da Península Ibérica.
O prezo do contrato do servizo de conservación e reposicións de parques e xardíns do Concello foi modificado este luns polo Goberno local, que decidiu aumentar en algo máis de 100.000 euros a cantidade que percibirá Cespa como empresa adxudicataria. Deste xeito, o prezo do contrato pasa a ser de 4.388.000 euros.
As actividades programadas para conmemorar a Reconquista de Vigo neste 2008 comezarán o vindeiro luns, 10 de marzo, cunha conferencia a cargo do historiador Bieito Alonso, segundo anunciou este luns o presidente da Asociación de Veciños do Casco Vello, Henrique Macías, tras asinar co tenente de alcalde, Santi Domínguez, un convenio para potenciar a organización da festa.
A concelleira de Xuventude, Iolanda Veloso, asinou este luns un convenio de colaboración co director de zona para Galicia e Asturias da Caja de Ahorros del Mediterráneo (CAM), David Martíns. A finalidade deste acordo é fomentar a difusión da Hipoteca Xoven desta entidade. A hipoteca está dirixida ás persoas de entre 18 e 35 anos que queren mercar a súa primeira vivenda cunhas condicións pensadas específicamente para elas.