Vigo Social TV, seleccionado polo Goberno de España entre os 35 proxectos máis innovadores para combater a soidade non desexada
Vigo é o único proxecto seleccionado de Galicia cunha plataforma que beneficiará directamente a 325 persoas maiores e contará cun investimento de 494.000 euros do Goberno de España a través de fondos europeos.
O Ministerio de Dereitos Sociais seleccionou Vigo Social TV como un dos 35 proxectos máis innovadores para mellorar a calidade de vida das persoas maiores en situación de dependencia e soidade non desexada. A iniciativa do Concello é a única seleccionada de Galicia, contará cun investimento de 494.000 euros e prevese que beneficie directamente a 325 persoas e, indirectamente, a outras 1.300 entre familiares e persoas coidadoras.
O alcalde explicou que Vigo Social TV é unha plataforma interactiva, accesible e de fácil utilización que funciona a través dun dispositivo conectado á televisión das persoas maiores. O programa establece un modelo híbrido de atención presencial e virtual, con intervención profesional en psicoterapia e terapia ocupacional, para favorecer a autonomía, a socialización e combater a soidade non desexada.
A plataforma contará con diferentes canles para acceder a actividades de exercicio e formación, manter o contacto con familiares e amizades e realizar seguimento da saúde cun psicoterapeuta. Incorporará tamén un espazo específico para persoas coidadoras, con actividades e formación, e unha canle institucional con contidos culturais e de entretemento do Concello, exposicións, retransmisións de actos e vídeos turísticos.
Un dos elementos fundamentais do proxecto é precisamente o acompañamento profesional. Vigo Social TV non se limita á instalación dun dispositivo nos domicilios, senón que incorpora o seguimento de psicoterapeutas para axudar ás persoas maiores na xestión das emocións e prestarlles apoio psicolóxico. Esta é unha das partes máis valoradas do programa pola súa capacidade para actuar directamente fronte á soidade non desexada.
A iniciativa busca así mellorar a calidade de vida das persoas maiores con máis atención e socialización, ao tempo que ofrece apoio e descanso ás persoas encargadas dos seus coidados.
