O Concello aprobou preto de 5.000 axudas de emerxencia en 2023

O executivo vigués pechou 2023 aumentando o número das axudas de emerxencia concedidas, xa que na última comisión do ano aprobou o apoio a 74 persoas, por un importe de 25.511 euros. Así o explicou o alcalde ao apuntar que ao longo do ano pasado preto de 5.000 vigueses contaron co apoio do Concello para responder a situacións de urxencia, e que a esta partida de Política Social destináronse 1.300.000 euros.
O rexedor detallou que a maior parte das 74 axudas aprobadas na última quincena de 2023, un total de 51, destináronse a solucionar problemas de vivenda. A estas hai que sumar outros 21 apoios para luz e auga, e dúas para óptica.
Caballero lembrou que as axudas de emerxencia do Concello son compatibles co Ingreso Mínimo Vital.

Bonotaxi

O alcalde explicou que, na última xunta de goberno de 2023, o executivo local aprobou a subida das axudas de bonotaxi que perciben as persoas maiores con mobilidade reducida. Así, as persoas coas rendas de ata 800 euros ven incrementada a achega en 100 euros e dispoñerán dun máximo de 400 euros anuais. Os beneficiarios con ingresos de ata 1.100 euros contarán cun aumento de 75 euros ,co que contarán con 275 euros ao ano. O acordo fixa un incremento de 50 euros para quen ten ingresos de ata1.500 euros, fixando unha axuda anual de 150 euros.
Caballlero indicou que en 2023 o Concello destinou 17.300 euros para subvencionar o bonotaxi de persoas que o utillizan para acudir a citas de saúde, realizar xestións, así como a visitar a familiares. Tras apuntar que non hai listas de espera para acceder á subvención, lembrou que o prazo de solicitude permanece aberto durante todo o ano .