Abel Caballero avoga pola celebración “cada dous anos” dun evento económico de primeiro nivel na cidade
Durante a clausura do Viglobal Summit 2023, o alcalde e presidente de Zona Franca apostou pola organización de máis encontros como o organizado polo 75 aniversario do ente. Na última xornada, Abhijit Banerjee, Premio Nobel de Economía en 2019, expuxo a súa análise “crítica” do sistema sanitario dos Estados Unidos
O Viglobal Summit 2023, a iniciativa auspiciada pola Zona Franca de Vigo no 75 aniversario da súa fundación, pechou este mércores no Auditorio Mar de Vigo, coa posibilidade de ser a primeira edición de algo máis perdurable no tempo en virutde do desexo expresado polo alcalde que avogou pola celebración "cada dous anos” dun evento económico deste nivel.
Despois da sobresaínte intervención de Paul Krugman na xornada inaugural, outro Premio Nobel, neste caso, o economista indio-estadounidense Abhijit Banerjee, premiado co galardón en Economía en 2019, foi o encargado de realizar a última conferencia maxistral dun ciclo que puxo a Galicia e a Vigo no mapa da economía mundial.
Banerjee, premiado polas súas orixinais propostas para combater a pobreza global en todo o mundo, empregou o seu relatorio en analizar o sistema sanitario estadounidense, a súa patria de adopción, en contraposición co existente no seu país de orixe, India, e noutros da súa contorna. A crítica ao modelo dos Estados Unidos non se fixo esperar: “Estados Unidos gasta o 20 por cento do seu PIB na xestión da sanidade, máis do dobre que en España e nos países europeos da súa contorna e, con todo, a esperanza de vida alí é cada día máis baixa e moito menor que a europea. É un sistema carísimo e moi pouco eficaz”, asegurou Banerjee. O Nobel de Economía en 2019 recalcou esta idea afirmando que “se es rico e queres un tratamento de altísimo nivel, Estados Unidos é o mellor país para ir e recibilo, pero iso non serve para a cidadanía media”.
A segunda e última xornada do Viglobal Summit 2023 comezara coa intervención de Juan Carlos Escotet, presidente de Abanca, que foi entrevistado polo xornalista Martí Saballs. O banqueiro hispano-venezolano avogou por controlar o déficit para que así poidan baixar os tipos de interese, non descartou a saída a Bolsa da entidade e inclinouse polo aproveitamento dos fondos Next Generation como unha “oportunidade histórica para que poidamos enfrontar os retos da descarbonización e para apoiarnos na dixitalización como motor definitivo do progreso”.
O propio Saballs foi o encargado de moderar a primeira mesa redonda, que versou sobre o futuro da banca e na que participaron Mariona Vicens, directora de Innovación e Transformación Dixital de Caixabank; Antonio Ramalho, ex CEO de Novo Banco; e Rita Estévez, conselleira independente de MoraBanc e Liña Directa. A recentemente superada pandemia e o consecuente uso masivo do teletraballo en diversos sectores profesionais foron considerados como elementos chave para analizar como se están desenvolvendo as cidades como motor da economía.
Personalidades da talla de Andrés Rodríguez-Pouse, profesor da London Business School; Cristina García-Peri, directora de Desenvolvemento Corporativo e Estratexia do Grupo Azora; Pedro Siza Vieira, exministro de Economía de Portugal; e a catedrática de Economía da Universidade de Barcelona, Elisabet Viladecans participaron nesta última mesa redonda do encontro. O economista e político luso avogou por “preparar as nosas cidades para facer fronte a todos os condicionantes, pero sabendo que sempre imos querer estar cos outros e iso faise principalmente nas cidades”, mentres que García-Peri destacou que “o teletraballo está a tomar moitísima implicación no mercado inmobiliario”.
En resumo, Viglobal Summit 2023 serviu, ao longo de dúas interesantes xornadas de propostas, para repensar cara a onde vai a economía do futuro desde moi diferentes puntos de vista. E todo, co marco do 75 aniversario da fundación da Zona Franca de Vigo, un dos principais impulsores de progreso de toda Galicia.
