Caballero celebra que o Náutico de Vigo sexa referente no campionato de Optimist
O Meeting Internacional Cidade de Vigo abrirá a Excellence Cup 22/23, que se celebrará entre o 29 de outubro e 1 de novembro na cidade
Abel Caballero participou este martes na presentación do "Meeting Internacional Cidade de Vigo de Optimist" no que preto dun centenar de barcos xa confirmaron a súa presenza a dúas semanas do peche de inscricións. O certame, que "ten que ver co tempo no que vivimos no que o deporte se orienta na dirección da cultura de vida", sinalou o rexedor, encádrase na Semana do Atlántico que organiza o Real Club Náutico de Vigo.
José Antonio Portela, presidente da centenaria sociedade viguesa, acordou co Clube de Vela de Viana do Castelo que o evento regrese ás súas orixes. É dicir, primeiro desenvólvese o campionato de Optimist en Portugal (VIII Trofeu Cidade de Viana, 21 ao 23 de outubro) e, á semana seguinte (29 de outubro ao 1 de novembro), o meeting vigués. Con independencia dos gañadores particulares de ambos os certames, a suma das regatas de Viana do Castelo e Vigo dará dous campións de Optimist da Semana do Atlántico en función da idade.
Na presentación estivo presente tamén Sergio Fernandes, concelleiro de Deportes de Viana do Castelo, a quen Caballero agradeceu a presenza e referiu que o certame serve de "ponte entre dúas cidades que queremos unirnos a través da vela, o Náutico de Vigo e o Optimist".
Por vez primeira desde a internalización en 2014 da Semana en Optimist -cando o acordo entre os clubs náuticos de Vigo e de Viana-, en 2021 o peche da competición produciuse en Portugal e non en Galicia por unha cuestión do calendario luso. Agora, a competición volve ás súas orixes e todo se decidirá na ría viguesa.
O meeting vigués, un ano máis, pertence ao circuíto internacional de Optimist, aberto a regatistas estranxeiros. Nesta edición 22/23, Vigo volve abrir a serie de sedes, que pasan de catro a cinco. Tras Vigo, Palma (decembro), Cádiz e Torrevieja (xaneiro) e Palamós (febreiro).
Trece sociedades do país, cos principais reais clubs náuticos de España (Vigo, Valencia, San Sebastián, Palma, Gran Canaria ou Tenerife, só por citar algúns), aseguraron a participación dos seus mellores regatistas de Optimist. De feito, ata dez regatistas que defenderon a España no Europeo individual, no Campionato de Europa de seleccións ou no Mundial de Turquía navegarán na ría. Tamén haberá dous clubs náuticos de Finlandia, tal é a expectación da Excellence este ano. E falta por estampar a súa firma toda a frota galega, sempre importante, e a de Portugal, ademais de esperarse máis regatistas estranxeiros, moitos dos cales fan tanto o trofeo luso como o vigués, para concentrar na ría a uns 250-300 regatistas.