O novo PXOM duplica os usos públicos, zonas verdes e equipamentos
O alcalde, que asegurou aprobará o Plan Xeral de Ordenación Municipal cos 20 votos do Grupo Municipal Socialista, cualificou de “plan moi verde” o documento que chega o xoves ao Consello da Xerencia de Urbanismo e que aprobarase en Pleno no mes de agosto.
O novo Plan Xeral de Ordenación Municipal de Vigo incrementa espazos públicos e zonas verdes. Así afirmouno o alcalde en rolda de prensa na que aclarou que “máis da metade da superficie da cidade está cualificada de chan rústico” e cualificou o documento de “plan moi verde e especialmente medioambiental”. Deste xeito, das 11.000 hectáreas que ten Vigo, 6.261 están clasificadas no novo Plan como chan rústico.
Abel Caballero explicou que o PXOM reserva 7.545.887 metros cadrados de espazos para uso público, zonas verdes e equipamentos. “É o que necesitamos na cidade. O modelo antigo de especulación e “pelotazos” ten que mudar polo modelo de espazos públicos, uso público e zonas verdes”, subliñou.
Con isto, explicou que duplícase esta superficie na cidade que actualmente conta con 3.884.960 metros cadrados. O alcalde lembrou que “estes datos non inclúen espazos públicos supramunicipais como o Hospital Álvaro Cunqueiro ou a Universidade nin os parques forestais.
O rexedor explicou que en canto a zonas verdes e espazos de uso público o novo Plan contempla 4.897.210 metros cadrados incrementando en 2,7 millón a superficie actual. A mesma situación ocorre cos equipamentos que incrementa un millón de metros cadrados ata alcanzar os 2.648.677 metros cadrados.
Caballero anunciou que dentro dos equipamentos inclúense actuacións como a zona deportiva de A Balsa con 154.000 metros cadrados, a zona deportiva de Oia con 68.891 metros cadrados e a Biblioteca do Estado con 6.483 metros cadrados.