O Concello recupera para este 17 de Maio o bando escrito por Xela Arias polo Día das Letras Galegas de 2001
Anunciouno este mércores o alcalde, quen agradeceu a autorización concedida pola familia da autora homenaxeada este ano. Vinte anos despois, as verbas de Arias volverán plasmarse na celebración dun 17 de Maio, Día das Letras Galegas.
![O alcalde, xunto á nai e ao fillo de Xela Arias e a representantes da Fundación Penzol, na presentación en abril da mostra bibliográfica que acolle a Casa Galega da Cultura](https://xornal.vigo.org/storage/images/opt/aL7XYIzSAOP3g32ZNtkun9tpar9O2bywbJYgIGoa.jpeg)
As palabras que Xela Arias imaxinou para o Día das Letras Galegas de 2001 -adicado ao escritor Eladio Rodríguez-, e cristalizou no bando municipal daquel ano, verán novamente a luz este 2021. O alcalde de Vigo, Abel Caballero, notificou este mércores que aquel será o bando do Concello para este 17 de Maio, que recorda a figura da propia Xela Arias.
Segundo leu Caballero en rolda de prensa, o texto comeza así: “A nosa si é unha lingua de encontro, foino hai xa ben séculos, de rei e trobadores, que lembramos ao transcribila e que manexaban campesiñas e mariñeiros. Poder ser hoxe en escolas e mercados, en barcos, bancos e centros comerciais, pode selo hoxe entre rapaces, meniños e maila xente de tropa que todos conformamos”.
Por último, o alcalde de Vigo agradeceu “infinito” á familia da autora o permiso concedido para que o Concello poida recuperar para este 2021 as verbas escritas por Arias vinte anos atrás, e que permitirán “encontrarnos coa súa memoria e a súa poesía”.