Vigo recibe no Museo de Castrelos bens arqueolóxicos incautados polo Seprona
O municipal Quiñones de León custodia desde este mércores as pezas, recuperadas pola Garda Civil no marco dunha investigación que continúa baixo segredo xudicial. O alcalde, que asinou co coronel xefe da Comandancia a acta de depósito, valorou o “enriquecemento da cultura universal a través destas pezas que hoxe forman parte da luz e saíron da escuridade grazas ao Seprona”.
O acto contou coa participación da subdelegada do Goberno na provincia, Maica Larriba, o concelleiro de Cultura, Abel Losada, e o paleontólogo e profesor da Universidade de Vigo José Bienvenido Díez, quen fixo unha pequena explicación dos 21 bens máis interesantes expostos na planta baixa do museo.
Logo da visita e da sinatura da acta de depósito do material arqueolóxico e paleontolóxico, a cargo do alcalde e do coronel xefe da Comandancia, Simón Venzal, Abel Caballero trasladou o seu “recoñecemento” á Garda Civil pola súa “profesionalidade” e pola “importante achega cultural posta á disposición da autoridade xudicial”. “É unha gran mesaxe”, engadiu: “A cultura da paleontoloxía ten a protección dos corpos e forzas de seguridade do Estado, co apoio da Universidade, que achega o coñecemento”.
O rexedor felicitou “a todos os que participaron desde o Seprona no proceso de investigación”, que continúa o seu camiño no eido xudicial, e subliñou o “enriquecemento da cultura universal a través destas pezas que hoxe forman parte da luz e saíron da escuridade grazas ao Seprona”.
