Escoitar

O Pleno aproba inicialmente o regulamento do servizo de transporte urbano en autobús

A Corporación Municipal de Vigo deu o seu visto e prace inicial ao regulamento do servizo de transporte urbano de viaxeiros en autobús da cidade. De forma inmediata o proxecto queda a exposición pública para recibir alegacións e ser aprobado de forma definitiva nunha nova sesión plenaria.

mércores, 27 nov 2019
O Pleno Municipal ordinario do mes de novembro aprobou de forma inicial na súa sesión celebrada este mércores o regulamento do servizo de transporte urbano de viaxeiros en autobús de Vigo. O visto e prace do proxecto saíu adiante cos votos do PSOE e coa oposición do concelleiro non adscrito, o grupo mixto e o PP.

"Por lei, antes de conceder o servizo, ten que quedar regulado e no documento queda reflectido que o Concello organizará e controlará tanto as liñas como as paradas, tarifas, horarios e títulos", sinalou o concelleiro Javier Pardo durante a súa exposición.

Tanto Xabier Pérez Igrexas, concelleiro non adscrito do BNG, como Rubén Pérez, do grupo mixto pola Marea de Vigo, mostraron a súa desconformidade polo feito de que o goberno local rechazar as súas emendas ao regulamento. Pola súa banda, Alfonso Marnotes, do PP, sinalou que o seu grupo compartía a decisión da xestión indirecta e solicitou axilidade na tramitación do Plan Xeral.

O regulamento forma parte dos traballos preparatorios do novo contrato de transporte urbano colectivo e o obxectivo é regular as condición xerais de prestación e utilización do servizo de transporte urbano e os dereitos e obrigacións de usuarios e empresa. Tras esta aprobación inicial, o regulamento queda a exposición pública e posteriormente volverá ao pleno para o prace definitivo.

Modificación orzamentaria
Ademais, o Pleno aprobou cos votos a favor de PSOE e PP (concelleiro non adscrito e grupo mixto votaron en contra) a aprobación inicial de Modificación Orzamentaria da Xerencia Municipal de Urbanismo cunha cantidade de 1,6 millóns de euros para facer fronte a unha sentenza e a expropiacións.