Escoitar

O Concello finaliza as obras dos patios cubertos dos colexios García Barbón e Canicouva

Abel Caballero destacou este luns que o Concello de Vigo recepcionará este martes as obras dos patios cubertos do García Barbón e Canicouva, polo que o alumnado de ambos colexios xa disporán das novas instalacións coa apertura este mércores do curso escolar para Infantil e Primaria.

luns, 9 set 2019
Os colexios García Barbón e Canicouva xa dispoñen de patio cuberto despois de que o Concello de Vigo finalizase as obras en prazo para non interferir nas actividades escolares e estar a dispor do alumnado coa apertura, este mércores, do novo curso de Infantil e Primaria.

O alcalde de Vigo, Abel Caballero, ofreceu este luns en rolda de prensa os avances das obras do Concello de cara ao novo curso. O rexedor indicou que o Concello xa asumiu a construción de sete cubertas de patios de colexios (García Barbón, Canicouva, Rocío, Carballal e Castelao) e ten outras dúas en marcha (Balaídos e Pintor Laxeiro), ademais de quince peticións de outros tantos centros escolares.

O investimento municipal nos patios de colexios xa ronda os dous millóns de euros, mentres que nas becas de comedor son outro 1,8 millóns. Tamén explicou o rexedor que xa está avanzada a obra da rúa Coutadas para os accesos aos institutos Rosais 2 e República Oriental de Uruguay, cun custe de 400.000 euros, e os peches do Santa Irene e o Santo Tomé por un importe de 60.000 euros.

"Todo isto tería que pagalo a Xunta de Galicia, que gasta diñeiro en publicidade e propaganda pero que non atende á cidade de Vigo", indicou Abel Caballero.