Escoitar

María Méndez di que no 2010 no servizo de migración baixaron as consultas, pero medraron os expedientes de arraigo social

A concelleira de Benestar Social, María Méndez, fixo hoxe balance dos programas desenvolvidos ao longo de 2010 destinados ás persoas inmigrantes, entre os que destacou o incremento dos expedientes tramitados referidos ao arraigo social, que chegaron a 475 casos. A concelleira nacionalista sinalou que este aumento prodúcese a pesar do descenso do número total de consultas, que pasaron de 1004 no 2009 a 821 no 2010.

xoves, 10 feb 2011
1297354085Datos.JPG
María Méndez sinalou que no ano 2010 respecto ao 2009 tamén houbo un descenso no número de expedientes abertos, ao baixar de 853 a 675. Ao respecto apuntou que estes datos reflicten que chegan menos inmigrantes á oficina municipal de inmigración. Segundo explicou, aínda non se pode confirmar o número real de inmigrantes que hai en Vigo, que en 2009 foi de 17.870 persoas posto que ata o 1 de marzo non pecha o padrón, tras dous meses para valorar as baixas e altas. Sen embargo, os datos apuntan a que pode haber unha baixada no censo.

A concelleira de Benestar Social explicou que do total de expedientes tramitados, 174 referíronse ao reagrupamento familiar e 92 ao seguimento de menores. Respecto á situación xurídica das persoas que foron á oficina de inmigración, indicou que maioritariamente estaban en situación irregular, con 350 casos. A media de idade das persoas que empregan este servizo municipal sitúase entre os 31 e os 50 anos, e segundo indicou María Méndez, aproximadamente úsano o mesmo número de mulleres e homes e non hai diferenzas entre o seu estado civil.

Outro dos temas que tratou a concelleira nacionalista foi as medidas que se aplican dende a posta en marcha do Plan de Inmigración para acadar a integración das persoas inmigrantes. Neste sentido, salientou que en xuño de 2010 foi contratada unha mediadora intercultural, que desenvolve o seu traballo sobre todos nos centros escolares e con 20 unidades familiares de poboación romanesa. "Este eido require un traballo terrible para acadar a normalización", afirmou. No marco deste Plan, María Méndez destacou a posta en marcha de diversos servizos, como o de tradución, que é posible dende cada Unidade de Traballo Social. Ao respecto sinalou que se fixeron 67 servizos, entre os que destacan romanés, chinés e wolof. Mencionou tamén o servizo de casación, destinado á búsqueda de emprego para 10 mulleres no servizo doméstico e no ámbito da xerontoloxía.

A concelleira nacionalista indicou que para dar a coñecer estes servizos editáronse 3.000 exemplares da Guía de Recursos e 5.000 da versión reducida do Plan de Inmigración, que foron repartidos nos hospitais, asociacións veciñais e asociacións de emigrantes. A concelleira de Benestar Social apuntou que tamén se fixo unha campaña de sensibilización nos autobuses urbanos nos meses de agosto a outubro, co obxectivo de facer un chamamento ás persoas inmigrantes para que se empadroaran. Finalmente, comentou que se impartiron cursos de galego e castelán por parte do Servizo de Normalización Lingüística do Concello de Vigo. Ao respecto asegurou que é dunha demanda das persoas inmigrantes e que a súa solución "implica unha actuación transversal".

"Estamos orgullosas de como está marchando o Plan de Inmigración, porque para nós é fundamental a integración e a multiculturalidade", salientou. En resposta a pregunta sobre o investimento que supuxo a posta en funcionamento do Plan de Inmigración sinalou que o mantemento da Oficina Municipal de Inmigración ascende aproximadamente aos 400.000 euros no 2010. Apuntou que de momento non se sabe o investimento correspondente a 2011 porque non conta cunha partida fixa e depende da achega da Xunta. "O ano pasado a Xunta reduciunos 20.000 a achega á oficina de inmigración e este ano aínda non sabemos de canto disporemos", criticou.
Descargar todas as imaxes